Beste Ouer/Voog

 

Hierdie omsendskrywe handel oor:

1. Slaagvereistes vir graad 9

2. Gemeenskaplike take van assessering graad 9

3. Akademiese versuim

4. Kwartaaldatums

 

1.      SLAAGVEREISTES GRAAD 9

 

1.1    Die Nasionale Beleid aangaande Assessering en Kwalifikasies vir Skole in die AOO-band (Staatskoerant Nr 29626 van 2007) bepaal die vereistes vir vordering in graad 1-8, en bevordering in graad 9.

 

1.2    WKOD-omsendbrief 0030/2009 het genoem dat die nuwe vorderings- en bevorderingsvereistes wat bekendgemaak is in Omsendbrief 0018/2009 uitgestel sou word tot 2010. Daar is ook genoem dat Staatskoerant 29626 in die proses was om hersien te word.

 

1.3    Let asseblief daarop dat die huidige vorderings- en bevorderingsvereistes, soos bepaal in Staatskoerant Nr. 29626, in 2010 gebruik sal word.

 

2.      STAKING VAN DIE GEMEENSKAPLIKE TAKE VIR ASSESSERING (GTA’s) IN GRAAD 9

 

3.1         Staatskoerant Nr. 32836: Implementering van die aanbevelings van die taakspan aangestel om die  implementering van die  Nasionale Kurrikulumverklaring Graad R – 12 te hersien, noem dat die GTA’s in graad 9 gestaak is en dat dit onmiddellik van krag word.

 

3.2         In die plek van die graad 9 GTA’s, sal skole in die Wes-Kaap voortgaan met hulle eie interne assesseringsprogramme en hulle eie interne eksamens in alle leerareas in graad 9 afneem.

 

3.3         Die graad 9-interne eksamens wat in kwartaal 4 afgeneem moet word, moet 25% van die totale punt vir elke leerarea uitmaak.

 

3.4         Die formele assesserings in graad 9 wat gedurende kwartale 1 – 3 afgeneem word, sal 75% van die totale punt per leerarea uitmaak.

3.      AKADEMIESE VERSUIM

 

3.1    Dit het onder my aandag gekom dat enkele leerders - wat nie hul huiswerk volledig doen of take/aktiwiteite nie ingelewer het nie - onderwysers se opdragte om die versuimklas direk na skool by te woon blatant verontagsaam.  U sal verstaan dat soortgelyke gedrag nie geduld kan word nie.

3.2    Hierdie stelsel word gebruik om te verseker dat u kind op datum is met sy of haar werk voordat daar met die volgende dag se akademiese lading begin word.

3.3    Daar sal in die vervolg baie streng teenoor hierdie leerders opgetree word.

 

4.      KWARTAALDATUMS

 

4.1    Die tweede kwartaal begin op Maandag 12 April 2010 en eindig op Woensdag 9 Junie.

4.2    U word as ouers gevra om hierdie datums te eerbiedig. Die skool kan nie alternatiewe reëlings tref om aan te pas by ouers se programme nie.

4.3    Om maksimum akademiese tyd te benut sal die Junie-eksamen eindig op Woensdag 9 Junie 2010 en geen veranderinge of aanpassing sal vir individuele leerders gemaak kan word nie.  Rapporte sal in die eerste week van die derde kwartaal aan ouers gestuur word.

4.4    Die wegbly van leerders in die laaste week van ‘n kwartaal is ‘n kommerwekkende verskynsel wat ook by ons skool voorkom.  Die vermorsing van hierdie akademiese tyd sal nie verder toegelaat word nie en soortgelyke eksamens- en toetsprosedures(soos met die Junie-eksamen) sal waar moontlik in die toekoms tot in die laaste week van die skoolkwartaal gevolg word.

 

Die HS Dirkie Uys is ‘n akademie-plus-skool wat beteken dat akademie die belangrikste komponent in die vorming van u kind is. Let op die minimum slaagvereistes waarna leerders moet strewe op die agterste bladsy van Kwartaalbrief 1 aan die einde van die eerste kwartaal aan u gestuur. Bestudeer die akademiese handleiding wat in harde kopie aan elke ouer gestuur is of die elektroniese voorbeeld op die skool se webtuiste by www.dirkieuys.co.za onder “akademie”.

 

Ek wens u en u kind alle sterkte toe met sy of haar akademiese vordering hierdie kwartaal en nooi u vriendelik uit om die onderskeie oueraande vir graad 8 en 9-12 by te woon. Kom gesels gerus met u kind se onderwyser.

 

Groete

  

Daneil J. Ross

SKOOLHOOF