Top 10

ADMINISTRATIEF

NUWE DIRKIE UYSERS

KULTUUR
ARGIEF

FOTO'S 2008

SKOOLHOOF BLOG BLADSY

“The key is not the WILL to win – everybody has that, it is the WILL to prepare to win that is important!”
(Bobby Knight)

MAAK HEEL ONS VENSTERS

Oorspr Jeanette de Klerk-Luttig

Die BY Sa 16/1/2010 

Ek het die artikel deur die bekende Jeanette de Klerk-Luttig met groot snoep verslind! In hierdie artikel skryf sy ‘n ope brief aan hoofde, ouers, leerders en die gemeenskap rakende sekere kernwaardes – waar die gebrek daaraan lei tot ondergaan en middelmatigheid en die nastrewe daarvan tot sukses aanleiding gee.

Sy beweer dat skole se standaarde verbeter  kan  word, indien onderwysers, ouers en kinders vennote word in die oordra van hierdie waardes.

Volgens opstelle wat sy in ‘n landswye kompetisie ontvang het soek kinders die volgende kernwaardes in hul skool, ouerhuis en onder-mekaar:

1.  OMGEE

2.  EERLIKHEID EN INTEGRITEIT

3.   SELFDISSIPLINE/WERKSETIEK/UITMUNTENDHEID

4.  RESPEK

5.  VERANTWOORDELIKHEID.

In die volgende paar weke gaan ek aandag gee aan die verskillende kernwaarders wat elke dag onmisbaar deel van ons almal se lewens behoort te wees.

Die onlangse dalings in die nasionale (60%) en provinsiale (75%) matriekslaagsyfers het die sin van hierdie artikel al hoe meer na vore laat kom.  Sukses word hoofsaaklik bepaal deur ons ingesteldheid – ‘n ingesteldheid wat tot ‘n groot mate deur persoonlike waardes – die manier hoe ons dink - bepaal word.  Hierdie waardes dien as ankers of fondamente waarvandaan besluite geneem word. Gesien teen die feit dat tieners bogenoemde waardes uitgekies het – hulle vra daarna – moet dit vir ons as onderwysers en ouers as rigtingwysers dien oor hoe ons ons kinders se lewens kan rig en inspireer.

Die vraag is of u as ouer al hieraan gedink het en dus elke dag doelgerig  u opvoeding aanwend om u kind se lewe en lewensbeskouing te vestig. Die voorbeeld wat u as ouer en ons as onderwysers vir u kinders stel rig uiteindelik hul aksies en besluite. As u omgee sal u kinders omgee; as eerlikheid vir u belangrik wees, sal u kind ook daarna strewe ens.

Volgende week: die eerste waarde: u kind vra dat ons sal “omgee”.

– Kyk gerus na die video clip om te sien hoe u kind u as ouer nadoen.

PRYSUITDELINGSREDE GELEWER OP DONDERDAGAAND 22 OKTOBER 2009

Ons skriflesing vannaand kom uit:

Genenis 1 vanaf vers 26

Toe het die Drie-enige-GOD gesê:  Kom ONS maak die mens as ONS verteenwoordiger, ONS beeld sodat hy kan heers oor die vis in die see, die voëls in die lug, die mak diere, die wilde diere en alles wat op die aarde is.

Die Here het die mens in die tuin laat woon om dit op te pas en te bewerk.

Matt 21 vers 18

Vroeg die môre op pad terug stad toe het Jesus honger gekry.  Toe HY ‘n alleenstaande vyeboom langs die pad sien gaan HY daarheen, maar HY het niks anders as blare daaraan gekry nie.  HY sê toe vir die boom:  Jy sal in der ewigheid nooit weer vrugte dra nie.  Die vyeboom het verdroog.

Matt 25 vers 14

Die gelykenis van die muntstukke – Vir een het hy 5 goue muntstukke gegee, vir ‘n ander 2 en vir die derde een 1.  Hy het aan elkeen volgens sy bekwaamheid gegee. Die man het sy besittings aan hulle toevertrou.  Die wat gewoeker het met die geld het ‘n beloning ontvang, terwyl die slaaf wat sy muntstuk begrawe het in die diepste duisternis uitgewerp is.

Loner B Mead skryf:

GOD ROEP ONS ALTYD OM MEER TE WORD AS WAT ONS WAS.

Geagte meneer die Burgemeester, dames en here

In hierdie skrifgedeeltes lê aan die een kant opgesluit die rede vir die mens se bestaan hier op aarde – om te heers om te werk en om te woeker met die talente wat aan elkeen van ons deur ons SKEPPER uitgedeel is, aan elkeen volgens sy of haar vermoë.

Aan die ander kant stel GOD ‘n verwagting vir WAT ons met hierdie talente gemaak het – talente wat eintlik SY besittings is – besittings wat vir HOM van baie groot waarde is, soos bewys deur sy liefde vir ons as mens.

Watter groot stuk verantwoordelikheid  seuns en dogters, ouers en personeel - lê nie hierin vir ons elkeen opgesluit nie? Is ons bewus van hierdie verantwoordelikheid?

Vanaand vier baie skole oor die hele land hul prysuitdelingsfunksie – waar leerders beloon word vir die harde werk gedurende die jaar – vir die woeker met die muntstukke/talente wat aan hulle uitgedeel is. 

DONALD KATTS  Moderator van die Volkskerk skryf in Die Burger van 21 Oktober iets hieroor:

TOG MEEN EK DIE  SUKSES VAN ‘N PRYSUITDELINGSAAND, DIE SUKSES VAN DIE POGINGS VAN ALMAL BETROKKE, DIE SUKSES VAN DIE LEERDERS LÊ IN DIE SOORT LEERDER, STUDENT EN BURGER EN IN DIE MENSLIKHEID VAN DIE PERSOON EN DIE PERSOON AGTER daardie LEERDER.

Ons sê vannaand nie net geluk aan elke leerder wat sy talente vermeerder het nie, maar ook dankie vir elke ouer en onderwyser wat agter daardie leerder vanjaar gestaan het.

HDU het vanjaar talle suksesse behaal waarop ons baie trots is. Maar weet u daar is “iets” waarop ons baie trotser moet wees – ‘n doelwit waarna ons elkeen baie harder moet werk.

• ·        Die skool en die ouerhuis is ‘n werksbank van morele vorming. 

• ·        Skole en ouerhuise is gemeenskappe van karakterbou. 

• ·        Skole en ouerhuise is mensvormende fabrieke. 

Dus kan die impak van onderwysers, die onderwyskultuur (en ja HDU) en die ouerhuis nie onderskat of gering geag word nie.  Skole mag nie net die intellektuele kapasiteit van leerders toets nie – dit moet die menslike georiënteerdheid, die burgelike ingesteldheid en persoonlike veranwoordelikheidsin toets.   Slaag ons leerders hierin DAN is ons as skool en ouerhuis, ons gemeenskap, kerk of regering eers suksesvol EERS DAN kan ons feesvier en geniet.

PAULUS skryf in 1 Kor 13 vers 1-3 Om die liefde te besit en om lief te hê is om mens te wees om menslik te wees en menswaardig te wees DIT is waaroor dit eintlik behoort te gaan in die lewe.

Hierin lê meer as intellektuele vermoë en materiële sukses – hierin lê die roeping waarvan ons gelees het in Genesis – die roeping om as MENS te heers oor SY godgegewe skepping.

Mag elkeen van ons wat vannaand hier sit – onderwysers, ouers en leerders – hierdie opdrag van GOD deelmaak van ons lewens.

Ek dank u

JUNIE/JULIE

"Die pad na sukses is altyd onder konstruksie"

Anoniem

DEEL1

BESTE OUER/VOOG

Bogenoemde aanhaling is vergestaldt in die wese waaroor opvoeding gaan.  In DEEL 1 van my blog vir hierdie twee maande wil ek met u as voog en ouer oor SUKSES gesels.

Irving Berlin skryf dat die moeilikste deel van sukses is dat jy dit nie net een keer kan doen en dan bly dit so nie.  Jy moet aanhou werk daaraan.  Hierin lê opgesluit die wese van sukses - ook op  skoolvlak.  Eddie Cantor skryf ,tong in die kies ,dat dit ongeveer twintig jaar se harde werk kos om oornag 'n sukses te wees.  Die geheim van sukses  is verder ENTOESIASME, ja meer nog OPWINDING.  Dis mense wat kan opgewonde raak oor dinge, wat 'n sukses maak van die lewe.  'n Mens kan absoluut enigiets regkry as jy begeesterd daaroor raak.. 

Entoesiasme plant sterre in mense se oë en sit veerkrag in hulle tred.

Walter Chrysler skryf dat GEESDRIF die dinamiek agter alle vooruitgang is.  DIe vraag is nou deel u kind in hierdie entoesiasme en geesdrif? U as ouer moet die skool bystaan in die poging om u kind entoesiasties en geesdriftig oor sy akademie te kry.  Die bekende engelse aanhaling "attitude determines altitude" is baie waar. 

Die begin van sukses is nie om buitengewone prestasies te behaal nie, maar om die gewone dagtaak met buitengewone toewyding te vervul.  Dit is hierdie toewyding wat die waterskeiding tussen sukses en mislukking veroorsaak.  Dit is ook belangrik om daarop te let dat sukses nie 'n skat is wat alleen deur mense met buitengewone talente ontdek word nie;  dit is nie net hulle alleen wat weet waar om daarna te gaan soek nie.  Elkeen wat sy plig nie net met ywer begin nie, maar dit met getrouheid dag na dag uitvoer , hy SAL sukses behaal.

Kyk na u kind se rapport - bespreek sy/haar punte - en meet sy/haar sukses teen dit wat u so pas gelees het.

Daneil J. Ross

(Lees my brief in die Tweede Kwartaalbrief saam met hierdie BLOG}

MEI 2009

RIGLYNE VIR AKADEMIESE VORDERING

Beste Ouer/Voog

Ek glo dat u kind se akademiese vordering ook vir u as ouer/voog van groot belang is.  Die skool moet in hierdie verband hand aan hand saam met die ouerhuis werk om te verseker dat u kind wel akademies presteer.

Ons moet ons kinders leer om slegs met die beste  in die lewe tevrede te wees - dit geld natuurlik ook t.o.v. hul akademiese vordering op skool.  Alhoewel die departement minimum vereistes daarstel om te slaag - moet ons kinders daarna strewe om volgens hul vermoëns te presteer.

Graag deel ek met elkeen van u die volgende riglyne wat u as ouer/huis/voog kan gebruik om te verseker dat u kind wel presteer.

1.  U moet u kind se akademiese roetekaart met hom of haar bespreek.  Die roetekaart verseker dat u kind doelgerig (met teikens) leer, voorberei en hopelik presteer in die toetse en eksamens.

2.  Dit is belangrik dat u as ouer belangstel in die vakke wat u kind op skool onderrig in ontvang.  Laat u kind sy/haar take en projekte vir u wys.  Maak seker dat u alle toetse teken.  U ontvang 'n toetsrooster (ook op die webtuiste beskikbaar) en antwoordstelle behoort binne 5 dae gemerk te wees.  U kan so die gehalte van u kind se werk agterkom.

3.  Plek van studie:  Maak asseblief seker dat u kind wel 'n plek by die huis het om te studeer.  Die koshuise se studiesale is beskikbaar indien u nie bedags tuis is nie en u die nodige reëling wil tref om te verseker dat u kind studeer. 

4.  Monitor of u kind weet wat vandag in die klas bespreek is.  Vra hom of haar uit oor wat hulle in wiskunde of geskiedenis gedoen het.  Dit wys aan u kind dat u wel belangstel in sy of haar werk.  U moet daarop let dat die grootste studietyd tydens KLASSE plaasvind.

-  hulle moet in elke geval hier wees so gebruik klastyd effektief

-  dit verminder die leertyd by die huis

5.  Kontroleer asseblief inkomtye van u kind - u kind moet gewoond raak aan roetine.  Weet waar u kind is en die skool wil u versoek om seker te maak dat u kind gedurende die week nie onnodig uitgaan nie.

Ons het 'n probleem  Maandagoggende dat leerders nie wakker is nie. Wat hulle verloor in die klas moet hulle op 'n ander tyd inhaal.

Daar is akademiese mentors vir sommige graad 12-leerders aangestel.  Hierdie mentor sal op 'n informele manier u kind se akademiese vordering monitor en hom of haar ook motiveer. 

Kom ons werk saam aan u kind se sukses!

Ek wil graag afsluit met die volgende aanhaling:

"Moenie bang wees nie,

EK is by jou,

moenie bekommerd wees nie,

EK is jou GOD.

EK versterk jou, EK help jou,

EK hou jou vas,

met my eie hand red EK jou."

JESAJA 41:10

Sterkte met die Junie-eksamens

MAART 2009

12/3/09

Beste Ouer/Voog

Baie dankie vir die pragtige terugvoering wat ek van vele ouers oor die onderwerp WYSHEID ontvang het.  Daar was heelwat versoeke oor WAARDES en die bepaling van 'n WAARDESTELSEL en ek het dus besluit om vir u iets hieroor te skrywe.

"Alle groot leiers (ouers) weet dat deugde en waardes die hoekstene  van enige beskawing vorm."

Noel Tichy

Die verhaal word vertel dat die Groot Muur van China net drie keer deur  vyandelike magte gebreek is, en dit was die drie kere toe die wagte omgekoop is.  Daar is nou onlangs op die nuus deur 'n minister genoem dat die versoekings van die publiek daartoe lei dat staatsamptenare korrup raak!! Ds Braam Hanekom skryf dat dit JUIS die verantwoordelikheid van hierdie staatsamptenaar is om hierdie waardes voortdurend onder die vergrootglas te plaas en korreksies aan te bring indien nodig.

 Ons verkeerde besluite moet voor ons eie deur gelaat word - ons kinders moet besef dat die maak van keuses gepaardgaan met verantwoordelikhede.  Dit is egter die keuses wat gemaak word waarmee ons as ouers en ons kinders sukkel.  Daarom is dit so belangrik dat ons waardesisteme vir kinders kan aanleer wat hulle elke dag kan gebruik in die maak van hierdie keuses!  Die vraag is egter hoe doen 'n mens dit?

1.  Klaar die waardes van jou familie/gesin uit en formuleer dit duidelik vir jou kinders.

Wat is die dinge (regte dinge) waarin jy as ouer glo? - is dit  dalk eerlikheid, hoflikheid, respek en jou afhanklikheid van jou Hemelse Vader?  Ek wil vir u sê dat hierdie paar waardes waarna ek verwys het genoeg is om meer as die helfde van jou kind se keuses ELKE dag REG te beinvloed.  Gesels met jou kind hieroor - vra hom watter van hierdie waardes by sy mentor in die lewe bestaan/uitstaan?  Skryf die waardes voor in sy of haar Bybel of skryf dit bloot op 'n stukkie papier en plaas dit op sy of haar kussing of bed.  Maak 'n bladwyser en gee dit vir hom/haar om in sy of haar huiswerkboekie te sit. U kind moet egter hierdie waardes deelmaak van sy of haar lewe.

2.  Gee kans dat jou kind hierdie waardes gebruik en toets - hulle sal een of ander tyd 'n besluit oor eerlikheid moet maak - hoflikheid en respek moet betoon aan iemand waarvan hulle nie hou nie en hul Hemelse Vader moet vra om hulle te help in die neem van 'n moeilike besluit.  Die hele kurrikulum in die onderwys is geskoei op waardes wat ons vir kinders moet aanleer - dit neem tyd en moeite en kinders leer dit nie sommer maklik aan nie.  U as ouer kan ons help om hierdie proses van "aanleer" te versnel as u dieselfde waardes in u huisgesin handhaaf en aanmoedig.

3.  U as ouer moet SELF hierdie waardes uitleef - as u dit van u kind verwag.  U kind leer deur te sien en te ervaar.  Voordat ons die waardes nie eers met onsself uitgeklaar het nie, kan ons nie dit vir ander leer nie.

4.  Oefen - oefen - oefen.

Braam skryf dat foute veral onder druk gemaak word - is dit nie waar nie? 'n Mens oefen 'n waardesisteem in.  Die uitleef van bepaalde waardes is eintlik maar 'n vorm van aangeleerde gedrag.  Dit is 'n GOEIE GEWOONTE!  Dit moet GEOEFEN word!

5.  Herinner jou kind ELKE dag aan die waardes waarin jy as ouer glo - glo my hy of sy gaan dieselfde waardes eendag vir hul kinders leer en dan sê - ek het dit by my pa en ma geleer.  Braam skryf dat "WAARDES LEK" - ek het nogal gewonder wat hy hiermee bedoel?  Ek dink dit beteken dat die maklik is om met jou kind oor 'n waardesisteem ooreen te kom en dit môre te vergeet! So SKRYF DIT, WYS DIT en Sê DIT!

Laastens miskien 'n paar voorbeelde van waardes wat ek as onderwyskundige glo kinders sal help om met WYSHEID beter besluite te neem:

• eerlikheid en verantwoordelikheid

• respek en hoflikheid

• moed en volharding

• lojaliteit

• dissipline en plig - "môrelig roepingsplig"

• nederigheid

• balans - dit is nie nodig om myself te oordoen om myself te geniet nie

• jou afhanklikheid van jou Skepper

John Ruskin skryf:  " Neem vaardigheid en liefde, span dit saam met harde harde werk - en verwag 'n wonderwerk."

Die vorming van waardes neem tyd, MAAR het tog 'n onmiddelike invloed op u kind se lewens - een wat blywend van aard kan wees.

D.J. Ross

SKOOLHOOF

DEEL (2)

OOR WYSHEID

Braam Hanekom skryf in sy boek:  Gebede wat Leiers(ouers ingesluit) bid soos volg:

Wat dink jy is die grootste geskenk wat jy aan jou kind kan gee? Geloof sou seker boaan die meeste se lysie wees, maar Pheneas Dube het my 'n antwoord op die vraag gegee wat my diep laat dink het.  Hy het gesê:

"Gee aan 'n kind WYSHEID voor hy groot is."

Ouers u sal met my saamstel dat daar min vaardighede is wat jou so teen die emosionele pyn van die lewe kan beskerm soos WYSHEID.  Dit is juis die neem van wyse besluite wat hierdie pyn sal voorkom of juis die neem van dwase besluite wat die pyn veroorsaak.

Die vraag egter is hoe ons hierdie wysheid eerstens kan bekom en tweedens aan ons kinders kan oordra?

In die tweede deel van my gesprek oor wysheid gaan ek veral aandag gee aan hoe ons hierdie wysheid kan bekom?

Braam skryf dat wysheid op die volgende maniere bekom kan word:

1.  Deur wyse mense en mentors.

Ek glo dat elkeen van u 'n mentor het of iemand na wie u kon en kan opkyk.  Die vraag is egter of u kind so iemand het?  Behoort u as ouer nie die een te wees nie?'n Mentor moet dien as klank- of kontrolebord wat deur sy of haar ondervinding beter (wyser) besluite kan neem. Help u kind om 'n goeie mentor te kry.

2.  Deur pyn.

Wysheid kom dikwels deur pynlike ervarings en ondervindings wat ons in die lewe opdoen.  Ongelukkig los sommige van hierdie ondervindings letsels op ons lewe wat nie maklik weer uitgewis kan word nie.

Theodore Levitt het geskryf:

"Ervaring is wat ons leer uit wat ons gedoen het.  Wysheid is wat ons leer uit wat ons verkeerd gedoen het."

Ek het as Skoolhoof al so baie te doen gekry met kinders wat moes leer uit dit wat hulle verkeerd gedoen het. Kom ons leer EERDER uit dit wat ons of ons mentor REG DOEN!

3.  Deur waardes en deugde.

'n Gesonde waardestelsel maak ingewikkelde besluite dikwels baie eenvoudig.  Ons moet ons kinders leer om "streetwise" te wees om intuïtief op hul voete te kan dink wanneer hulle deur die lewe (maats) gekonfronteer word.  Kinders moet weet "wat die regte ding is om te doen" - hulle kan dit NET doen as hulle 'n goeie waardesisteem as verwysingsraamwerk het.  Dit gaan oor hoe u u kind grootmaak en waarin u wil hê sy of hy moet in/aan glo!

4.  Nederigheid.

Leer u kinders om nederig te wees:  '"n Wyse mens leer uit ander se ervaring;  'n verstandige mens uit sy of haar eie ervaring; en 'n dwaas steur hom aan niemand se ervaring nie" Wees voorbereid op die lewe en die uitdaginge wat dit bring - leer uit jou foute en ook uit ander se foute - GK Chesterton skryf:  "'n vertrek sonder boeke is soos 'n liggaam sonder 'n siel." LEER LEER LEER

5.  Deur blootstelling.

So baie ouers is bang om hul kinders aan nuwe idees, denkpatrone ens. bloot te stel - sommige weer laat as ouers hopeloos te veel toe.  Wat is die balans dan?  Vertrou jou kind deur jou eie opvoeding as ouer te vertrou - as jy dit nie kan doen nie, moet hom of haar dan nie blootstel om lewenservaring op te doen nie. Deur jou kinders goeie waardes te leer sal aan hom of haar die verwysingsraamwerk gee om met WYSHEID goeie en die regte besluite te neem.

6.  Deur saam met jou GOD te lewe.

Die boek van SPREUKE is elke keer dat ek dit lees weereens vir my persoonlik 'n openbaring.  Daar is soveel antwoorde op soveel vrae in daardie Bybelboek vir elkeen van ons as ouers en ook vir ons kinders.  GOD is die bron van alle WYSHEID - deur naby HOM te leef lewe ons elke minuut van die dag in WYSHEID.

Kom ons gee wysheid aan ons kinders VOORDAT hulle groot is!

D.J. ROSS

SKOOLHOOF

deel (1)

"Gee my nou wysheid en kennis dat ek hierdie volk reg kan lei, want wie kan uit homself hierdie groot volk van U regeer?"

2 Kronieke 1:10

Beste Ouer/Voog

Wysheid is seker een van die moeilikste dinge wat ons as onderwysers, ouers, voogde of mens in ons werkplek elke dag najaag.  Dit is wysheid wat ons soek om 'n belangrike besluit in ons lewe te neem of om 'n beslissing in ons familie of werkplek te maak.

Ds Braam Hanekom skryf in sy boek "GEBEDE VIR LEIERS" die volgende:

Wysheid begin met die dien van die Here, sê SPREUKE.  Dit het baie te doen met die kennis van GOD en is op'n vreemde manier maar net om meer en meer soos GOD te dink.  Is dit nie waar nie liewe Ouer/Voog?

Braam skryf dat dit die vaardigheid is om ingewikkelde besluite eenvoudig te laat lyk.  Wysheid is INSIG en BEGRIP. Insig oor presies wat die feite is en begrip dat my kind nie die son is waarom al die planete wentel nie.  Ek kry so dikwels te doen met ouers wat nie die professionele mening of besluit van die skool rakende sy kind wil of gaan aanvaar nie.  Ek kan u verseker dat ons hierdie menings, aanbevelings of besluite neem met wysheid wat elke dag van die Here afgebid word. 

Wysheid is die vaardigheid om groter patrone of die geheelbeeld raak te sien, waar ander net sy of haar kind se omstandigheid sien.  Laasgenoemde is dikwels die rede waarom ons kinders nie kan verstaan waarom die antwoord NEE is nie! Wysheid help elkeen van ons as onderwyskundiges of ouers om verder en dieper as die onmiddellike werklikheid te kyk, om selfs te sien wat op ons wag.  Ons moet ons kinders egter juis DIT leer - 'n vaardigheid wat hom of haar sal maak of breek in die werklikheid daarbuite.

U as ouer/voog moet elke dag besluite neem rakende u kind en u familie - besluite waarmee u moet saamleef - dikwels onpopulêre besluite vir die wat nie daarmee saamstem nie.  As u egter hierdie besluite van die Here afgebid het glo ek dat u gemaklik daarmee sal kan saamlewe.

Ek wil daarom vir elkeen van ons ouers/voogde hierdie wysheid toewens - mag u die insig en begrip ontvang om met WYSHEID u kind en familie se lewens te rig.

"Wysheid is dalk die een handvatsel waarmee ons as nietige mense tog 'n beperkte greep op die lewe kan kry."

Daneil J. Ross

SKOOLHOOF

5 November 2008

REDE GELEWER BY DIE PRYSUITDELING VAN HDU WOENSDAGAAND 21 OKTOBER 2008

Geagte raadslid Kitchoff, die Koch-familie, eregaste, ouers, personeel en leerders.

Ons skriflesing vir vannaand kom uit:

Mark 4:21

En Jesus het gesê:  ‘n Lamp kom mos nie onder ‘’n emmer of onder ‘n bed nie?  Is dit nie bedoel om op ‘n staner gesit te word nie?

Matt 25:14

‘n Man het op reis gegaan en vir elkeen van sy slawe muntstukke gegee. Vir een het hy vyf goue muntstukke gegee, vir ‘n ander twee en vir ‘n derde een.  Hy het aan elkeen volgens sy bekwaamheid gegee en toe op reis gegaan. Die een met vyf het dadelik daarmee gewoeker en nog vyf gemaak.  So ook die een wat twee gekry het.  Maar die slaaf wat een gekry het het dit begrawe. Toe die man terugkom het hy verantwoording van elkeen geeis.

HDU staan bekend as een van die spogskole in die Wes-Kaap – ‘n skool sonder grense – een wat die deure vir kinders oopmaak.  Dit bly egter elke kind se verantwoordelikheid om SELF deur hierdie deur te stap.

Vannaand dwars oor die land is baie skole  op hierdie oomblik besig om leerders te beloon vir die talente waarmee hulle vanjaar gewoeker het.  GOD sê aan ons dat ons moet kom deel in SY vreugde en dat HY saam met ons bly is.

Een van die pragtigste aanhalings wat ek nou onlangs tee gekom het sê:

“Nothing is impossible:  there are ways that lead to everything, and if we had sufficient will we should always have sufficient means.  It is often merely of an excuse that we say things are impossible.”

Vannaand is ‘n klinkklare bewys dat hierdie stelling waar is.

Aan die pryswenners:

1.                 Weens dankbaar vir die talente wat jy ontvang het.

2.                 Onthou om vannaand en môre-oggend die mense te bedank wat die nodige deure vir jou vanjaar oopgemaak het EN

3.                 Weet dat GOD saam met jou bly is.

‘n TERUGBLIK OP 2008

Dit was Socrates wat die lewenspad vergelyk het met ‘n marathon waaraan die mens deelneem.

Die roete bestaan uit gelyke dele, opdraendes wat gevolg word deur ‘n afdraende. Die belangrikste element van sukses om hierdie marathon te vergelyk is nie so seer die fiksheid of talent van die deelnemer nie, maar die deelnemer se INGESTELDHEID.

TOEPASSING OP HDU

Ons almal hier kan met trots na die jaar 2008 terugkyk.  Ja daar was opdraendes, maar daar was ook gelyke vlaktes en afdraendes.  HDU het hom as skool deur sy prestasie weer eens gevestig as – nie net een van die toonaangewende skole in die Weskus nie – maar ook as ‘n sentrum van uitnemendheid in die provinsie.  Daarvoor moet ons ons leerders, ouers, onderwyser en die gemeenskap bedank vir hul bydraes.

·        100% matriekslaagsyfer

·        A-kandidate

·        Beste prestasies in Engels, Geskiedenis, RTT en N&S in die Weskus/Wynland en Swartland distrik

·        Meer as 33 provinsiale en streekskleure vir sport en ligawenners vir seunstennis/nasionale toer vir ‘n groot groep leerders

·        Puik Eisteddfod uitslae –  100% in opstelle, bekerwenners en die koor wat as die beste in die Eisteddfod aangewys is.

·        En dan – elke persoonlike oorwinning en prestasie wat leerders

Williams James sê:  Die grootste ontdekking nog ooit – is dat mense hulle lewe kan verander deur hulle GESINDHEID teenoor die lewe te verander.

Ons vier vannaand hierdie GESINDHEID – hierdie OORWINNING.

Kom ons bid saam:

Ons Vader

In Jes 41:10 sê U:

·        Moenie bang wees nie, EK is by jou

·        Moenie bekommerd wees nie, EK is jou GOD

·        Ek versterk jou, EK help jou

·        EK hou jou vas

·        Met MY eie hand red ek jou.

Baie dankie Vader dat u so lief is vir ons.  Ons dra elke oorwinning vanjaar aan U op.

AMEN

Baie geluk aan elkeen wat vannaand ‘n prys ontvang.  Mag jou talente jou in staat stel om ‘n verandering in ons pragtige land te bewerkstellig.

DANKIE

10 Oktober 2008

Dit is vandag amptelike onderwyserdag by HDU en ons kry die geleentheid om ons leerkragte te bedank vir hul diens aan HS Dirkie Uys.  Aan elkeen van my onderwysers en administratiewe personeel 'n groot dankie vir dit wat julle elke dag doen.  Baie dankie vir die verskil wat julle elke dag maak in die verwesentliking van "SKOOL SONDER GRENSE"

Lees gerus die volgende pittige aanhalings rakende onderwysers:

"A good teacher is like a candle - it consumes itself to light the ways for others."

"In teaching you cannot see the fruit of a day's work.  It is invisible and remains so maybe for twenty years."

Jacques Barzun

"What the teacher is, is more important than what he teaches."

Karl Menninger

"Teachers who inspire know that teaching is like cultivating a garden, and those who would have nothing to do with thorns must never attempt to gather flowers."

Haim G. Ginott

"Those who educate children well are more to be honored that parents, for these only gave life, those the art of living well."

Aristotle

"The only reason I (teacher) always try to meet and know the parents better is because it helps me to forgive their children."
Louis Johannot

"There are three good reasons to be a teacher - September, October and November."

Daneil J. Ross

26 September 2008

Die Derde Kwartaal was een van vele hoogtepunte vir HDU - hoogtepunte waarop die skool baie trots kan wees.  Ek sluit die volgende pragtige gedig/gebed van Koos du Plessis in vir u om te geniet:

Laat my nooit die grond verlaat nie

Laat my in u skadu bly

Gee dat elke aardse vreugde en vrees

Eindelik nietig word vir my

Elke afdraai padjie ken ek

elke keer het ek gedwaal

Elke keer het u my iewers kom haal

Maak dit Heer die laaste maal

Elke dag is 'n gedagte

Elke kamer net gehuur

elke aardse droom van rykdom en roem

net 'n skadu teen die muur

Wat ek is, is net genade

Wat ek het is net geleen

Eintlik smag ek na U waters van rus

Lei my Heer vandag daarheen.

Gebruik die rustyd en geniet dit saam met elkeen van u geliefdes.

D.J. Ross

15 September 2008

"Aanhouer Ernst wen uiteindelik GOUD"

As u Die Burger van vanoggend se voorblad gesien het, sal u weet dat Ernst van Dyk die handfietswedren oor 48.4km gewen het en so 'n goue medalje by die Paralimpiese Spele verower het.

HS Dirkie Uys was dus bevoorreg om Ernst as gasspreker te kon ontvang tydens die skool se Groot BRAG in Augustus.  Wilhelm de Swardt van Die Burger berig dat hierdie prestasie tiperend van Ernst is - 'n pesoon wat oortuig is van die feit dat "aanhouers altyd wen". Ernst, wat die Boston Rolstoelmarathon al sewe keer gewen het, het gesê dat hy 16 jaar lank vir die goue medalje gewerk het en dat dit beslis die hoogtepunt van sy sportloopbaan is.  Ons wens Ernst alle voorspoed vir sy deelname aan die rolstoelmarathon.  Mag hierdie wedloop jou tweede goue medalje lewer.

Mag elke Dirkie Uyser hieruit 'n lewensles leer.  Die hyser na sukses is dikwels buite werking en ons moet die trappe een vir een klim. Die een wat egter volhard om die trappe te klim sal uiteindelik bo-uit kom en die oorwinning smaak.  Mag Ernst se voorbeeld veral vir ons Matrieks 'n groot bron van inspirasie wees.

Daneil J. Ross

8 September 2008

"Leierskap (ouers/onderwyser) is nie 'n posisie wat net behou moet word nie,

maar 'n INVLOED wat elke dag uitgeoefen moet word."

Prof. Jonathan Jansen

Dit was my voorreg om die SAOU se Hoofde Simposium verlede week in PE te kon bywoon.  Prof. Jansen het by die geleentheid 'n referaat oor die VYF TAKE van 'n skool gelewer.

Volgens Prof. Jansen kan skole se funksionering in VYF TAKE opgesom word, nl.:

1.  Primêre Taak:

Hy sien die primêre taak van die skool om leerders te LEER om te leer, terwyl dit die werk van die ouer is om hul kinders op te voed.  Volgens hom is daar 'n groot verskil tussen hierdie twee rolspelers in hul bydrae tot die kinders se basiese opvoeding. Langenhoven het by geleentheid gesê:  "Betaal 'n onderwyser om jou kind te leer, maar voed hom of haar self op." Kinders het hul ouers en ouerhuise elke dag so  nodig om hul lewe te rig en te stuur.

2.  'n Skool is 'n plek van veiligheid:

Volgens Prof. Jansen behoort elke skool die "klein plekkie" te wees waar die kind aanvaar word - hom of haarself kan wees.  Om aan hierdie behoefte te voldoen is die nodige strukture, dissipline en wedersydse respek nodig.  Die ouer kan hom of haar egter nie losmaak van hul aandeel om die skool in hierdie taak by te staan nie.  Daar is leerders wat nie die basiese respek het vir hulself, hul onderwysers en of mede-leerders nie.  Hy het die skokkende syfer bekend gemaak dat tot 75% van alle boelie-voorvalle onder veral DOGTERS voorkom.  Dit is belangrik dat ouers hul kinders die belangrikheid en waarde van wedersydse respek sal aanleer. Die onlangse voorval waar 'n leerder 'n ander met 'n swaard gedood het, is 'n tiperende voorbeeld hiervan.

3.  'n Skool is 'n plek van gemeenskapbou:

Die les wat die ekologie ons leer is dat as een ly almal in die ekologie ook ly.  Dit is belangrik dat die ouers en die gemeenskap hul EIE SKOOL sal vertrou om hul kinders te leer.  Hy het sterk te velde getrek teen ouers wat hul kinders uit hul gemeenskappe verwyder en by ander skole inskryf.  Nie net vernietig so 'n optrede die skool se voortbestaan nie, maar word die hele gemeenskap daardeur benadeel.  Hierdie leerders kon 'n positiewe bydrae gelewer het tot die op en uitbou van die gemeenskap.  Ook hierdie skool gaan jaarliks gebuk onder hierdie probleem.  Leerders beweeg einde graad 7 na ander skole in ander dorpe.  Hierdie optrede het nadelige gevolge op getalle, onderwysposte, bevorderingsposte, finansies, akademie, sport en kultuur en die sakegemeenskap in die dorp.  HDU staan weer aan die einde van 2008 voor hierdie probleem - een wat al hoe groter wordende probleme vir die skool bring. Mag hierdie "sosiale-gier" getem word, deur goeie gesonde verantwoordelikheid teenoor sy of haar gemeenskap en dorp.

4.  Plek om kinders te leer om saam te leef:

Die belangrike rol van die skool is ook om ons kinders voor te berei op die wêreld daar buite.  Elke leerder moet die belangrikheid van samewerking verstaan om uiteindelik 'n sukses te maak van hierdie pragtige land van ons.  Om kinders te isoleer van die buitewêreld bring ernstige wanbalanse mee wat hierdie jong mense dan moet oplos wanneer hulle die ekonomiese sosiale wêreld betree.

5.  'n Skool is 'n plek van HOOP:

Napoleon het by geleentheid verwys na onderwysers as "lighuise van hoop".  Winston Churchill het na homself en die onderwysberoep verwys as "bewaarders van die toekoms."  Elke leerder kan as jong mens 'n verskil maak aan die toekoms in hierdie mooi land van ons.  Hul optrede, ingesteldheid en hul drome kan die instrumente wees om die wonders van die toekoms te laat gebeur.  Schalk Brits en Ernst van Wyk het in hul besoeke aan ons skool u as ouers versoek om toe te sien dat u kind nooit sal ophou droom nie.  Mag dit u en ons doelwit wees om toe te sien dat dit elke dag gebeur.

As u nou my BLOG klaar gelees het, sal ek graag wil sien dat u as ouer en ons as skool ons op elkeen van hierdie VYF take sal beoordeel. Laat ons die nodige aanpassings maak - indien nodig - en mag ons hierdie VYF TAKE as maatstaf in ons opvoeding elke dag gebruik.

Daneil J. Ross

29 Augustus 2008

"Drome, doelwitte en 'n aksieplan is bestandele van 'n suksesresep."

Schalk Brits Springbok haker

Om in twee weke toegespreek te word deur Erns van Dyk wêreldkampioen in rolstoelmarathon en Schalk Brits Springbok haker is voorwaar 'n bewys dat die HS Dirkie Uys werklik 'n "skool sonder grense" is.

'n Uiters suksesvolle sport- en kultuur afsluitingsfunksie is Dinsdagaand aangebied.  Tydens hierdie jaarlikse geleentheid wens ons al ons provinsiale sportmanne en sportvroue geluk met hul prestasies - bedank ons die afrigters vir hul onbaatsugtige diens aan HDU en sê ons baie dankie aan elke borg wat die skool vanjaar ondersteun het.

Schalk se toespraak oor die belangrikheid van "drome"  is vir elkeen van ons van groot belang.  Schalk is 'n sprekende bewys van iemand wat nooit opgehou het om te droom of nooit opgehou het om aan te hou totdat hy sy drome verwesentlik het nie.  HDU se beste wense vergesel hom in sy loopbaan vorentoe.  Mag jy die groen trui nog vele male oor jou kop trek!

Dit was interessant om te verneem dat Schalk se moeder as onderwysstudent Wiskunde by Tossie van Heerden hier by HS Dirkie Uys geproef het!

Ernst vertrek eersdaags na die Paraplegiese Olimpiese spele en HDU het 'n spesiale kaartjie met goeie wense aan hom gestuur.  Ons glo dat jy weer die goue medalje terug sal bring!

'n Groot dank aan Petė, Henriette en Emma vir al hul insette om van hierdie funksie 'n suksesvolle en stylvolle geleentheid te maak.  My dank aan elke ouer, oudleerder en gemeenskap wat so lekker gebie het tydens die wynveiling.  Die uiteindelike wins wat gemaak is, sal later aangekondig word.

Vier van ons 015 rugbyspelers - Jason Kriel (11), JP Kotze (7), Dirk Kotze (8) en Flippie Jacobs (9) is in die Wes-Boland 015 Elite rugbyoefengroep opgeneem wat in Oktober aan 'n toernooi in Hermanus sal deelneem.  Baie sterkte met hierdie pragtige prestasie.

Daneil J. Ross

25 Augustus 2008

"You better watch out"

Orphan Annie

Dit was toneelweek op Moorreesburg en die spanning het hoog geloop onder onderwysers en leerders.  Die onderwysers het vanjaar die klug "Little Orphan Annie" opgevoer, terwyl die leerders die toneelstuk opgevoer het.  Dit was lekker vir my as hoof om te sien hoe die personeel "skielik" van karakter kon verander. Ek glo dat u saam met die gehoor geraai het wie watter karakter vertolk.  Ook hoop ek u kon agter kom wie die "little black thing" was?

Twintig graad 7-leerders van oor die hele Swartland het die openingsaand Woensdag bygewoon.  Die leerders is persoonlike deur my gekies om hul laerskole by die toneelfees te verteenwoordig.  Hulle het ook in die dogters-en seunskoshuise oornag waar hulle 'n spesiale werwingsprogram voltooi het.  My dank aan hul ouers en skole vir die vergunning. 

'n Groot dankie aan Daleen Retief wat elke jaar hierdie toneelweek op die planke bring.  Daleen jy kry elke jaar die onmoontlike met elke karakter reg!  'n Spesiale woord van geluk aan elke leerder met sy of haar vertoking van hul rol.  Elke speler het haar of sy karakter spesiaal gemaak.  Ek glo dit is seker die grootste kompliment wat ek as hoof aan elkeen van julle kan gee.  Julle was puik.

Die matrieks begin hierdie week met hul  September-eksamen.  Ek glo en vertrou dat elkeen reeds hard aan die hersien is.  Ek wens elke matriekleerder alle sterkte toe.  Onthou die woorde van Vince Lombardi:  " A man/woman can be as great as he/she wants to be."

Daneil J. Ross

18 Augustus 2008

"A man/woman can be as great as he/she wants to be. 

If you believe in yourself and have the courage, the determination, the dedication,

the competitive drive and if you are willing to sacrifice the little things in life

 and pay the price for the things that are worthwhile, it can be done."

Vince Lombardi

Wat 'n pragtige aanhaling van Vince Lombardi om die week te begin!  HDU het 'n uiters suksesvolle Interskole week agter die rug.  Alhoewel die Interskole uitslag puntsgewys presies gelyk geeïndig het, was dit 'n week waar die skool t.o.v. skooltrots en deelname met rasse skrede vooruitgegaan het.

Bogenoemde aanhaling is Donderdagaand pragtige in Ernst van Dyk se toespraak tydens die Groot Brag-byeenkoms versinnebeeld.  Enige persoon kan deur te droom enige doelwit wat hy/sy vir homself stel bereik.  Deur te glo in jouself - die nodige moed en dapperheid te toon,  deursettingsvermoë te openbaar, te  strewe om mededingend te wees en die nodige opofferings te maak in daardie dinge wat regtig saak maak - kan enige droom bewaarheid word.  Ernst van Dyk is 'n sprekende voorbeeld hiervan. 

In my eerste kwartaalbrief het ek die vraag gevra wat 'n "ware Dirkie Uyser" is?  Die skool se naam is ontneem van die kinderheld Dirkie Uys wat met moed en dapperheid gedoen het wat hy geglo reg is.  Elke Dirkie Uyser het verlede week hierdie droom met oortuiging uitgeleef.

Ek het Sondagaand aan 'n radiogespreksprogram deelgeneem waar ek dit weer eens beklemtoon het, dat ons kinders nie moet ophou om te droom nie.  Elke onderwyser en ouer moet seker maak dat ons kinders drome najaag.  Dit is drome wat verseker dat ons gemotiveerd elke dag begin en voltooi. 

"A man/woman can be as great as they want to be..."

My dank aan Suid-Afrika se eie wêreldkampioen Ernst van Dyk wat 'n sprekende voorbeeld is van hierdie aanhaling.  HDU wens Ernst alle sterkte toe met sy vertrek na Beijing oor 'n week of wat.  Mag hierdie olimpiese spele weer eens vir jou 'n oorwinning wees!

Daneil J. Ross

14 Augustus 2008

"We throw all our attention on the utterly idle question

whether A has done as well as B,

 when the only question is whether A has done as well as he could."

William Graham Sumner 1840-1910

INTERKOLE 2008

Opgesom in hierdie aanhaling is die kern van waaroor Interskole werklik behoort te gaan - naamlik dat elke leerder in sy of haar hoedanigheid, slegs hul beste moet lewer.  Dit sluit ook aan by my tema van hierdie week dat medioukerskap nie goed genoeg is vir die wêreld daar buite nie.

Ons seunshokkiespan het gister hul wedstryd teen Jan van Riebeeck met 3-2 gewen en ons koor het tydens die eisteddfod 'n eersteplek met 85% verwerf.  Laasgenoemde is voorwaar "uitnemendheid" waarop ons baie trots kan wees.  Die feit bly egter staan, dat elkeen in daardie spanne/groepe hul heel beste moes gee om die prestasies te kon behaal het. Dit is juis om daardie rede dat ons as skool vandag baie trots moet wees.

Een van die mooiste aanhalings wat ek onlangs teegekom het, was seker die een van Sumner.  Opgesluit in die lewenslesse wat leerders leer wanneer hulle sport beoefen is seker ook die volgende:

"Spanwerk halveer die taak maar verdubbel die sukses."

Onbekend

Mag ons as skool (leerders/ouers/onderwysers/gemeenskap) elke dag doelbewus daarna strewe om toe te sien dat ons kinders "sonder grense" groei en ontwikkel.

Ek nooi u as ouer uit na die GROOT BRAG vannaand met Ernst van Dyk as gasspreker.  Ernst is die huidige paraplegiese wêreldkampioen in die marathon vir rolstoelatlete - voorwaar 'n geweldige voorreg vir ons skool! Ek heet ook al die oudleerders en gaste welkom by hierdie spogfunksie. Kom geniet die aand saam met u kind en kom deel in die skoollogo van "skool sonder grense".

Daneil j. ross

12 Augustus 2008

"Die Hyser na sukses is stukkend.  Ons moet leer om die trappe een vir een te klim."

Onbekend

Of jy nou hou van Bill Gates of nie - die man weet waarvan hy praat.  Bill  het onlangs 'n toespraak by 'n Hoërskool gelewer oor 11 dinge wat leerders NIE op skool leer nie. Hy het gepraat van die sogenaamde "voel- goed-beleid"  wat leerders op 'n onrealistiese manier vir die praktyk voorberei.
Rule 1: Life is not fair - get used to it!

Rule 2 : The world won't care about your self-esteem. The world will expect you to accomplish something BEFORE you feel good about yourself.

Rule 3 : You will NOT make $60,000 a year right out of high school. You won't be a vice-president with a car phone until you earn both.

Rule 4 : If you think your teacher is tough, wait till you get a boss.

Rule 5 : Flipping burgers is not beneath your dignity. Your Grandparents had a different word for burger flipping: they called it opportunity.

Rule 6: If you mess up, it's not your parents' fault, so don't whine about your mistakes, learn from them.

Rule 7: Before you were born, your parents weren't as boring as they are now. They got that way from paying your bills, cleaning your clothes and listening to you talk about how cool you thought you were. So before you save the rain forest from the parasites of your parent's generation, try delousing the closet in your own room.

Rule 8: Your school may have done away with winners and losers, but life HAS NOT. In some schools, they have abolished failing grades and they'll give you as MANY TIMES as you want to get the right answer. This doesn't bear the slightest resemblance to ANYTHING in real life.

Rule 9: Life is not divided into semesters. You don't get summers off and very few employers are interested in helping you FIND YOURSELF. Do that on your own time.

Rule 10: Television is NOT real life. In real life people actually have to leave the coffee shop and go to jobs.

Rule 11: Be nice to nerds. Chances are you'll end up working for one.

Wat kan ons as leerders, onderwysers en ouers hieruit leer?  Dit is belangrik  om leerders op 'n realistiese manier vir die buite wêreld voor te berei.  Elke toets, aktiwiteit, taak, projek of poging moet op 'n realistiese manier gemeet word aan die vereistes wat deur die buite wêreld gestel gaan word - dit is "slegs die beste is aanvaarbaar".  Die dure les wat ons elke dag leer is dat daar geen plek vir medi-oukerskap is nie.

Daneil J. Ross

11 Augustus 2008

"Niks groots is nog ooit bereik sonder entoesiasme en deursettingsvermoë"

Winston Churchill

Die HS Dirkie Uys neem vandag 11 Augustus 2008 weer eens die voortou in die Weskus Distrik en in die Wes Kaap met die ingebruikneming van die Skoolhoof se eie BLOG.

Wat hierdie prestasie so spesiaal maak, is dat dit ook in die Interskole Week van 2008 plaasvind!

My dank aan Hestie de Waal HDU se IT-Bestuurder vir haar entoesiasme en deursettingsvermoë wat hierdie grootse projek moontlike gemaak het.

Die doel van hierdie BLOG is dat ek met elke kind, ouer, personeel en die gemeenskap op 'n daaglikse basis kan kommunikeer.

Onderwys het sy deure in 1876 op Moorreesburg geopen. Dit is dus al  132 jaar se strewe om uitnemendheid in die onderwys te bewerkstellig. As Hoof is ek elke dag geweldig trots op my kinders, ouers en personeel wat saam in vennootskap hierdie trotste skool bestuur.

Die woorde van Churchill moet elke sekonde van elke dag by elkeen van ons "spook".  Hierdie land het nie mediokerskap nodig nie, maar eerder "uitnemendheid" - die strewe om net die beste te wees in dit wat ons elke dag doen.  Dit is die doel van hierdie trotse skool om "jong volwassenes"  te lewer wat daarop uit sal wees om 'n positiewe verskil in die wêreld daar buite te maak.  Om dit te bereik het ek almal van u - ouers, onderwysers, gemeenskap en leerders - se insette en samewerking nodig.

Ek was sedert die opedag elke week besig met 'n uitgebreide werwingsprogram in die Swartland en kan u meedeel dat die sessies baie suksesvol afgehandel is.  Op Woendsdagaand 13 Augustus besoek 'n bestuurspan LS Saldanha waar 'n inligtingsessie vir die Graad 7-ouers aangebied sal word.  Die Superintendente van die twee koshuise sal ons vergesel.  Heelwat aansoek van LDU is reeds ontvang.  My dank aan Pete Kotze wat saam met my by graad 7-leerders en ouers  huisbesoek gedoen het.

U sal in die week 'n volledige Interskole Program ontvang.  Ek wil u "opkommandeer" om Saterdag u skool en u kind in Kaapstad te gaan ondersteun.  Onthou die "Tiere is op pad" - plakate agter in u motorvensters!

Ek het vandag besoek ontvang van 'n 8-persoon afvaardiging van die WKOD en Vakunies.  Die groep het 'n onderhoud met my gevoer as genomineerde vir uitnemende leierskap vir die WesKus/Wynland OBOS/Distrik.  Dit is vir my 'n geweldige voorreg om as Hoof die OBOS in die WesKaap afdeling te verteenwoordig.  Ek hoop en vertrou dat ek die vertroue wat in my gestel is, met waardigheid sal nakom.

Ek sal poog om hierdie BLOG daagliks aan te vul of soos die geleentheid hom voordoen. Gebruik die entoesiasme, meng dit met deursettingsvermoë en bewerkstellig so iets groots vir ons kinders se toekoms.

Daneil J. Ross